விவசாயிகள் வேலையை நிறுத்தி போராட்டம்

வெலிமடை, உவா பரணகம உள்ளிட்ட பல பகுதிகளில் உள்ள விவசாயிகள் இன்று (10) அனைத்து விவசாய பணிகளிலிருந்தும் விலகி வேலைநிறுத்தத்தை மேற்கொண்டுள்ளனர். இவர்களின் நீண்டநாள் பிரச்சினைகளுக்கு அரசு நியாயமான தீர்வுகளை வழங்கத் தவறிவிட்டதாகவும், 2026ஆம் ஆண்டுக்கான பட்ஜெட்டில் விவசாய துறை முற்றிலும் புறக்கணிக்கப்பட்டுள்ளதாகவும் குற்றம் சாட்டுகின்றனர்.

கேப்பெட்டிப்பொலையில் இன்று காலை வெலிமடை, உவா பரணகம உள்ளிட்ட பகுதிகளைச் சேர்ந்த விவசாயிகள் பெரிய அளவில் திரண்டு போராட்டம் மேற்கொண்டனர். நாட்டின் பல பகுதிகளில் உருளைக்கிழங்கு, வெங்காயம் அறுவடை தொடங்கியுள்ள நிலையில், தங்களின் விளைபொருளுக்கு நியாயமான சந்தை விலை கிடைக்கவில்லை என்று விவசாயிகள் கடந்த சில வாரங்களாகவே எதிர்ப்பு தெரிவித்து வருகின்றனர்.

உள்ளூர் அறுவடை நேரத்தில் உருளைக்கிழங்கு மற்றும் வெங்காய இறக்குமதியை அரசு அனுமதித்ததால், தங்களை முழுமையாக பொருளாதார ரீதியாக பாதித்துவிட்டதாகவும் விவசாயிகள் குற்றம் சாட்டுகின்றனர். இந்த சூழ்நிலையில் இந்தாண்டு பட்ஜெட்டிலும் விவசாயத் துறைக்கு போதிய முக்கியத்துவம் அளிக்கப்படாதது மேலும் அவர்கள் மனஅழுத்தத்தை அதிகரித்துள்ளது.

வெலிமடை மற்றும் நுவரெலியா பகுதிகளைச் சேர்ந்த விவசாயிகள் இணைந்து செயல்படும் "நாட்டின் விவசாயிகள் குரல்" என்னும் அமைப்பு நேற்று (09) அறிவிப்பு வெளியிட்டு, தங்களின் பிரச்சினைகள் இன்னும் தீர்க்கப்படாததால் இன்று முதல் அனைத்து விவசாயச் செயல்பாடுகளையும் நிறுத்தி தொழிற்சங்க நடவடிக்கையில் ஈடுபட இருப்பதாக தெரிவித்திருந்தது.