வடக்கு, வடகிழக்கில் காற்றுத் தரம் கடுமையாகக் குறைவு

இலங்கையின் பல நகரங்களில் காற்றுத் தரம் திடீரென மோசமடைந்து, ஆரோக்கியத்திற்கு ஆபத்தான நிலையை எட்டியுள்ளதாக மத்திய சுற்றுச்சூழல் ஆணையம் (CEA) அறிவித்துள்ளது.

வடக்கு மற்றும் வடகிழக்கு மாகாணங்களில் காற்றுத் தரக் குறியீடு (AQI) 150-ஐ கடந்துள்ளதால், பொதுமக்கள் அனைவருக்கும் பாதிப்பு ஏற்படும் வகையில் ‘அசாதாரணம்’ எனப்படும் சிவப்பு நிலை உருவாகியுள்ளது என சூழல் கல்வி மற்றும் விழிப்புணர்வு இயக்குநர் டாக்டர் அஜித் குணவர்த்தன தெரிவித்தார்.

குறிப்பாக யாழ்ப்பாணம், கிளிநொச்சி, மன்னார் ஆகிய பகுதிகளில் AQI 150 முதல் 200 வரை உயர்ந்து, சுவாச நோயாளிகளுக்கு தீவிர ஆபத்தான சூழல் உருவாகியுள்ளதாக அவர் கூறினார்.

இந்த நிலை ஏற்பட காரணமாக, வடக்கிலிருந்து நாட்டுக்குள் புகை, தூசி உள்ளிட்ட மாசுப்பொருட்கள் நுழைவதும், கடந்த வாரங்களில் ஏற்பட்ட வளிமண்டல மாற்றங்களும் காரணமாக உள்ளன என அவர் விளக்கினார்.

வரவிருக்கும் நாட்களில் காற்று மாசுபாடு மேலும் மோசமடையும் வாய்ப்பு இருப்பதால், சுவாச பிரச்சினைகள் உள்ளவர்கள் அவதானத்துடன் இருக்க வேண்டும் என்றும், மூச்சுத் திணறல் போன்ற பிரச்சினைகள் ஏற்பட்டால் உடனடியாக மருத்துவ உதவி பெற வேண்டும் என்றும் டாக்டர் குணவர்த்தன எச்சரித்துள்ளார்.