ஜேசன் சஞ்சய் இயக்கும் முதல் படத் தலைப்பு நாளை வெளியீடு

தமிழ் திரையுலகில் புதிய இயக்குநராக கால்பதிக்க உள்ள நடிகர் விஜய்யின் மகன் ஜேசன் சஞ்சய் இயக்கும் முதல் படத்தின் தலைப்பு நாளை அதிகாரபூர்வமாக வெளியிடப்பட உள்ளது.

தற்போது தமிழக வெற்றிக் கழகத்தின் அமைப்பிலும் அரசியல் பணிகளிலும் முழுமையாக ஈடுபட்டு வரும் நடிகர் விஜய், திரைத்துறையில் இருந்து தன்னைப் பின்னுக்கு வாங்கிக் கொள்ளப் போவதாகக் கூறப்படும் சூழலில், அவரது மகன் தன் முதல் இயக்குநர் முயற்சியுடன் சினிமாவில் அறிமுகமாகிறார் என்பதால் ரசிகர்களிடையே பெரும் எதிர்பார்ப்பு நிலவுகிறது.

ஜேசன் சஞ்சய் இயக்கும் இந்தப் படம் லைகா பிரொடக்ஷன்ஸ் நிறுவனத்தாலும், ஜேசன் சஞ்சயின் சொந்த தயாரிப்பு நிறுவனமான JSK மீடியாவாலும் இணைந்து தயாரிக்கப்படுகிறது. இப்படத்தில் நாயகனாக சந்தீப் கிஷன் நடிக்கிறார், மேலும் இசையமைப்பாளர் தமன் படத்துக்கு இசையமைக்கிறார்.

பணம், அதிகாரம் மற்றும் அதனைச் சுற்றியுள்ள குற்ற உலகை மையமாகக் கொண்ட ஆக்ஷன் த்ரில்லர் வகையில் இந்த படம் உருவாகி வருகிறது என்று படக்குழுவின் வட்டாரங்கள் தெரிவிக்கின்றன. படப்பிடிப்பு தற்போது வேகமாக நடைபெற்று வரும் நிலையில், நவம்பர் 10 ஆம் தேதி படத்தின் டைட்டில் வெளியிடப்பட உள்ளது.

இதற்காக வெளியிடப்பட்டுள்ள ப்ரொமோ போஸ்டர் ஒன்றில் கையில் கட்டுகளும், ரத்த காயங்களும் கொண்ட ஒரு நபர் எரியும் பணக் கட்டுகளுடன் தோன்றும் காட்சி வெளியாகியுள்ளதால், இப்படம் தீவிரமான ஆக்ஷன் கதையைச் சொல்லப்போகிறது என்பது தெளிவாகியுள்ளது.

தமிழ் மற்றும் தெலுங்கு ஆகிய இரு மொழிகளிலும் இப்படம் உருவாகி வருவதோடு, அடுத்த ஆண்டின் தொடக்க காலத்தில் படம் திரையரங்குகளில் வெளியிடப்படும் என்று எதிர்பார்க்கப்படுகிறது.