கோவை வன்முறைக்கு மாணவியும் காரணம்: கஸ்தூரி சர்ச்சை

கோவை மாணவி மீது நிகழ்ந்த கூட்டு பாலியல் வன்முறை சம்பவம் தமிழ்நாட்டில் பரவலான அதிர்ச்சியை ஏற்படுத்தியுள்ள நிலையில், அதைப் பற்றிய தனது கருத்து காரணமாக நடிகை மற்றும் பாஜக நிர்வாகி கஸ்தூரி கடும் சர்ச்சையை எதிர்கொண்டிருக்கிறார்.

சமீபத்தில் செய்தியாளர்களிடம் பேசியபோது, இந்த வன்முறைக்கு காரணமாக பாதிக்கப்பட்ட மாணவியும், அவளுடன் இருந்த ஆண் நண்பரும் ஒரு அளவில் பொறுப்புண்டு எனக் கூறியிருப்பது சமூக வலைத்தளங்களில் கடும் எதிர்ப்பை தூண்டியுள்ளது.

கடந்த 2ஆம் திகதி கோவை விமான நிலையம் அருகே கார் நிறுத்தப்பட்டிருந்த இடத்தில் கல்லூரி மாணவி ஒருவர் தனது நண்பருடன் பேசிக்கொண்டிருந்தபோது, மூன்று பேர் கொண்ட கும்பல் தாக்குதல் நடத்தி மாணவியை பாலியல் வன்முறைக்குள்ளாக்கிய சம்பவம் பெரும் அதிர்ச்சியை ஏற்படுத்தியது.

குற்றவாளிகள் பின்னர் காவல்துறையால் கைது செய்யப்பட்டனர். ஆனால், இந்த விவகாரத்தில் பாதுகாப்பு நடவடிக்கைகளை புறக்கணித்ததே இந்த நிலைக்கு வழிவகுத்ததாக நடிகை கஸ்தூரி கூறியிருப்பது பலரின் கோபத்தையும் கண்டனத்தையும் கிளப்பியுள்ளது.

அவரது பேச்சில், இளைஞர்கள், குறிப்பாக பெண்கள், இரவு நேரங்களில் தனிமையான இடங்களுக்கு செல்வது பாதுகாப்பு அபாயங்களை ஏற்படுத்தும் என கூறி, பெற்றோர் கனவுகளுடன் குழந்தைகளை படிக்க அனுப்புகின்றனர்; அதற்குப் பதிலாக தேவையில்லாத சூழல்களில் சிக்கிக் கொள்ளக் கூடாது என்றார்.

இதேசமயம், “பெண்ணியம் என்ற பெயரில் பாதுகாப்பை மறந்து நடப்பது தவறு” என்ற அவரது கூற்று பெண்கள் மீதான குற்றங்களை நியாயப்படுத்துவதாகவும், பாதிக்கப்பட்டவர்களின் மீது குற்றச்சாட்டு சுமத்துவதாகவும் விமர்சகர்கள் கூறுகின்றனர்.

பாலியல் வன்முறைக்குள்ளான பெண்ணையே குற்றவாளிகளைப் போல சாடுவது துரதிர்ஷ்டவசமானது, அது முற்றிலும் பின்னடைவு கருத்து என சமூக ஊடகங்களில் பலரும் கடும் எதிர்ப்பு தெரிவித்துள்ளனர்.

கஸ்தூரியின் இந்த கருத்து மக்கள் மத்தியில் பெரும் சர்ச்சையை உருவாக்கி, பெண்களின் பாதுகாப்பு மற்றும் சமூக பார்வைகள் குறித்த கேள்விகளை மீண்டும் முன்னிறுத்தியுள்ளது.